Biyunge watir marang bocahe, ramane malah watir karo watune

ilustrasi
ilustrasi

Kiye dudu crita dopokan, crita ngapak atawa crita ngarang. Crita Banyumasan kiye bener-bener kedaden. Nembe bae pirang dina kepungkur, ana bapak-bapak karo ibu-ibu teka maring RS Elisabeth Purwokerto, nggawa anake sing esih bocah arep dipriksakna maring dokter rumah sakit sing alamate ning Jalan Dr Angka Purwokerto. Lha anake meriang apa jane?

Bocahe mau digawa maring rumah sakit dudu kerana meriang, watuk pilek atawa disentri. Bocah mau arep dipriksa amerga ngeleg watu! Lha kepriwe sih nganti watu akik bisa kepangan atawa kaleg maring njerone weteng bocah mau?

Ana-ana bae pancen crita ning jaman watu akik. Werna-werna pancen jenise watu akik, ana sing abang, ireng, kuning, ijo, biru, wungu lan liya-liyane, uga ana sing warna-warni alias panca warna. Toli angger sing polos alus sewarna persis kaya permen fox atawa permen mentos. Bunder alus rupane.

Nah kuwe bocah mau nemu watu akik sing ujar-ujare atawa ndarani premen ndean. Ramane ya asal bruk, ndokon watu sembarangan, nggeletak ning duwur meja. Watune demut karo si bocah mau, trus…. mlebu ning weteng kaleg! Geger mower sakaluarga, uga tangga-tanggane. Geliseng crita, bocahe digawa maring rumah sakit.

Sing marahi geget, jare dokter sing mriksa, dr Kuncoro, biyunge panik atawa watir maring kesehatane bocah mau. Wedi lan maras mbok ana efek samping maring bocah mau, ya anake kuwe, karena watune mlebu weteng! Lha ramane atawa bapake malah watir marang watune… Haladhalah anu watu larang ndean apa yah, dadi watir watune ilang.

Terus priwe bocah lan watu mau? Jarene dokter ya detunggu bae, pirang dina maning toli watu akike metu karo ‘kotoran’ si bocah. Hehehe … kiye bakal kelakon ana bocah ‘buang air besar’ isine kotoran campur watu akik.

Apa ya ramane arep nenggoni bocahe kuwe pas wayahe maring WC? #@!? Ana-ana bae ya sedulur…. Gara-gara batu akik, repot temen yah. Duh! (BNC/ist/foto ilustrasi youtube)

2 Comments

Leave a Reply

Alamat email Anda tidak akan dipublikasikan.


*


This site uses Akismet to reduce spam. Learn how your comment data is processed.