“GREETING SEASON” PERESMIAN BANDARA JB SOEDIRMAN KUWE PREKARA GAMPANG

Menteri Rini Soemarno meninjau bandara JBS saat awal pembangunan

“GREETING SEASON” PERESMIAN BANDARA JB SOEDIRMAN KUWE PREKARA GAMPANG

Hari Widiyanto

Jeremonge, tanggal rolikur April taun kiye Bandara Jenderal Besar Soedirman Purbalingga agep deresmikna. Wis mesti mengko bakal ana greeting season rame pisan neng Medsos sing surasane mangayu bagya dumadege bandara neng tlatah eks Karesidenan Banyumas. “Selamat atas persemian Bandara Jenderal Besar Soedirman Purbalingga,” pocape mbekayu Darsem pegiat Medsos sekang Pegandhulan neng propil pesbuke sing degawe sekang aplikasi potosop. “Melu Mongkog, Bandara Jenderal Besar Soedirman wis Molaih Dedarati Mongtor Mabur,” setaptuse Pak Kaswad neng propil pesbuke. Semena uga, pangocape para priyagung pemrentahan kasil pitakona para juru werta media cithak lan elektronik.

Dumadege Bandara JB Soedirman neng Purbalingga apa kur cukup desambut kambi greeting season sekang werga masyarakat Purbalingga khususe lan werga masyarakat Banyumas Raya umume. Sewetara sing nduwe pamikir kanggo nyengkuyung supaya mongtor mabur sing ndarat lan maur sekang Bandara JB Soedirman lewih semendhing ketimbang sing kur aweh pangucap rasa gumbira dumedega bandara kuwe.

Sedawane mongtor mabur sing ndarat/mabur ngedhunna lan nggawa penumpang kargo cacah akeh, mongtor mabur bakal terus ndarat lan mabur neng bandara anyar kuwe. Ningen angger kebalikane, ya kuwe angger mongtor mabur sing ndarat lan mabur kur semendhing nggawa penumpang lan kargo, suwesuwe ya bebeh ndarat lan mabur maning.

Bandara JBS diujicoba

Mulane mayuh, para birokrat pamrentahan, dunia usaha, komunitas masyarakat lan individu masyarakat khususe Purbalingga lan Bayumas Raya umume pada saiyek saeka praja nyewiji, aja kur teyenge gawe layer pangucap rasa gumbira lan mongkog kur dadi “greeting season” neng jagad Medsos. Ningen uga debarengi pamikir, kepriwe konsupaya bandara anyar kuwe langgeng ana lan akeh mongtot mabur sing mabur banjur ndarat, banjur mabur maning sekang bandara anyar kuwe.

Pamrentah pusat wis ngawekna infrastruktur perhubungan udara neng Purbalingga khususe lan neng Bayumas Raya umume. Pamrieh konsupaya ekonomi neng tlatah Bayumas Raya gayeng regeng. Gole aweh pawujud rasa kesuwun aring pemrentah pusat ora kur rasa mongkog lan gumbira uga kudu aweh pangucap syukur lumantar layer neng Medsos, uga lumantar pamikir. Mula kuwe Pamrentah daerah, dunia usaha lan masyarakat ora kur sing neng Pubalingga kudu melu mikir banjur nglairna tindak pikir kepriwe carane konsupaya bandara anyar kiye gayeng regeng.

Pamikir konsupaya bandara anyar kiye regeng lan gayeng salah sijine ya kuwe pemerintah daerah, dunia usaha lan masyarakat (khususe komunitas masyarakat) mikirna gawe isian kegiatan masyarakat kaya dene kegiatan masyarakat olah raga bal-balan. Bageting elok angger birokrasi pamrentahan, dunia usaha lan masyarakat (khususe komunitas masyarakat olahraga bal-balan) nyewiji gawe pangrembug konsupaya stadion Goentoer Daryono Purbalingga, stadion Soemitro Kolopaking Bajarnegara, GOR Satria Purwokerto lan Stadion Wijayakusuma Cilacap dadi stadion venue pertanding bal-balan liga utama. Sukur bagen angger patang stadion kuwe teyeng dadi “home base” stadion kesebelasan bal-balan klasemen liga utama. Temtu bae ora usah ndadak ngenteni Persibangga Purbalingga, Persibara Banjarnegara, Persibas Bayumas lan PSCS Cilacap mlebu klasemen liga utama. Deneng kae, Persis Solo, Persiba Bantul, PSS Sleman, PSMS Yogyakarta durung ora mlebu utawa durung mlebu maning aring klasemen liga utama teyeng ndadekna stadione dadi stadion laga lan tandang pertandingan bal-balan liga utama?

Nglobi bareng PSSI, PT LIB lan KONI sing delakona dening patang pihak sekang patang kabupaten lewih irit lan ringkes ketimbang nglobi dhewek-dhewek. Ora siki kapan maning? Mumpung agi pandemi Covid 19, angger Pandemi Covid 1 wis rampung toli kari gol..gol..gol.. Ketimbag mengko bandara anyar kur dedarati mongtor mabur sedhela merga langka menumpange lan seteruse bandara anyar kuwe mangkrak???

Be the first to comment

Leave a Reply

Alamat email Anda tidak akan dipublikasikan.


*


This site uses Akismet to reduce spam. Learn how your comment data is processed.