Lomba Pidato Basa Penginyongan Pengeti HUT Korpri Kaping 48

Annisa – Juara 1 lomba pidato Basa Penginyongan

BanyumasNews.com – Kanggo mengeti HUT kaping-48 KORPRI tingkat Kabupaten Cilacap, Selasa, 19/11/2019, neng Gedung Graha Pemuda Jl. Soedirman No.16 Cilacap, 19 anggota Korpri Eselon IV lan III SKPD Kabupaten Cilacap melu Lomba Pidato Basa Penginyongan.

Jere pantia, lomba kiye kanggo nyurung Aparatur Sipil Negara (ASN) migunakna basa penginyongan neng lingkungane. Seteruse ASN supaya nuladhani migunakna basa penginyongan aring masyarakat kanggo basa pedinan.

Panitia lomba pidato basa penginyongan netepna rong irah-irahan pidato ya kuwe: Ngregani kanca sekantor sing beda-beda agama, suku, ras lan kepinteran, lan sinau nggo nambahi keprigelan kerja ngabdi masyarakat.

Lomba debukak dening Kepala Dinas Pendidikan dan Kebudayaan Kabupaten Cilacap Drs. Budi Santosa, M.Si. Miturut panjenengane, lomba pidato basa penginyongan kiye wis lumaku kaping pitu. Tujuane kanggo nukulna nilai-nilai lokal Banyumasan kaya dene karakter cablaka. Karakter lokal sing ngemu teges linuwih kiye bangeting apik angger deatrapna kanggo ngayaih pegawean dines pedinan.
Karakter cablaka minangka karakter apa anane antara sing ana neng lati utawa sing kewetu, sing keucap, lan sing ana neng ati utawa neng batin.

“Mula kuwe, sejrone lumaku ngayaih tugas leladhen aring masyarakat, ASN kudu adhedhasar karakter cablaka”,  pangendikane Drs. Budi Santosa M.Si.

Miturut layang kekancingan dewan juri: Drs. Tejo Sutrisno (Dhalang Wayang Kulit/Guru SMK Muhamadiyah I Cilacap), Jefrianto, S.Pd (Guru Basa Daerah SMK Ksatrian Purwokerto) lan Hari Widiyanto (penggiat basa Penginyongan sekang Purwokerto), ana peyayi telu sing kasil menangna lomba. Ya kuwe Juara I: Annisa Fabriana, SH. M.Si. (Camat Cilacap Selatan); Juara II: Sudiman, Kasi Penetapan BPPKAD; Juara III: Jasun, SE.,M.M. (Kasi Angkutan Dalam Trayek Dinas Perhubungan) Annisa Fabriana, SH., M.Si bisa kasil juara I merga ngugemi kriteria penilaian sing dekarepna dening pantia.

Kejaba kuwe Annisa Fabriana, SH., M.Si pancen kaya temenanan agi dadi pembina apel lan gole dadi pembina apel kaya yayakha pisan. Neng panggung, dheweke nyisipna nyanyian dolanan bocah jaman kuna.

“Putih-putih neng kuburan.. bujungan
Kuning-kuning neng kukusan.. ta. wong
Ireng-ireng neng suketan..bribil wedhus.. ggo dhir-dhiran.”

Karuan bae, para peyayi neng Gedung Graha Pemuda kaya dene dewan juri, para rawuh lan para panitia padha ngguyu ger-geran.

Para pemenang juara I, II lan III nampa piala lan hadiah dhuit sekang panitia lomba. (hw)

Be the first to comment

Leave a Reply

Alamat email Anda tidak akan dipublikasikan.


*


This site uses Akismet to reduce spam. Learn how your comment data is processed.