Urip kuwe perjuangan – Guyon Banyumasan

Ditulis 19 Mei 2016 - 06:28 oleh Banyumas1

Ana bocah gole ngomong cadel (cedal) moni R dadi L. Sawijineng dina bocah iki tuku sega goreng maring warung nasi goreng sing mangkal perek umahe deweke.

Dina 1 :

C: “Tuku sega goleng 1 ya, pak?!”

A: “Apa…?” (Ngeledek)

C: “Sega Goleng!”

A: “Apa …?” (Ngeledek maning)

C: “Sega Goleng!!!”

A: “Ohh sega goleng…”

Wong sing lagi pada tuku sega goreng pada gemuyu. Si bocah balik ngumah karo mbededeg atine. Tekan umah bocah iki banjur niat banget blajar ngucapna “nasi goreng” sing bener, ora cedal maning. Ngeduke tuku sega goreng maning.

Dina 2:

Si bocah kanti sumringah, pengin pamer angger deweke wis bisa ngucap R, dadi bisa pesen sega goreng ora salah maning (ora cedal).

C: “Pak, nyong tuku SEGAGORENG, bungkus!!!”

A: “Oke sip… nganggo apa?”

C: “Nganggo telol…” (njawab mbari lara ati… ‘Bapake sih ndadak takon nganggo apa mbireng’).

Bakul sega goreng karo wong sing lagi ngantri pada gemuyu. Si bocah cedal balik karo mbededeg. Ningan ora putus asa, ning umah latihan ngucap TELOR, ben cetha.

Ngesuke maning…

Dina 3:

C: “Pak… tuku SEGA GORENG, nganggo TELOR!!! Bungkus!” (seru lan mantep!)

A: “Ceplok apa dadar?”

C: “Dadal…”  (si Bocah spontan njawab, tapi atine nggrentes… ).

Kepriwe maning, duh biyung… bocah kuwe ora putus asa, latihan maning… DADAR… DADAR… DADAR …

Bareng ngesuke …

Dina 4:

Wis modal latihan 4 dina, ben ilate ora cedal maning gole pesen SEGA GORENG, tur ora dadi bahan perguyon wong-wong sing lagi pada tuku… Semangat 45!!!

C: “Bapake… tuku SEGA GORENG, nganggo TELOR, diDADAR, 1 bungkus!”

A: “Wuih, hebat kowe ndul! Wis ora cedal maning. Oke ya, regane Rp. 8000.”

Si bocah ngenei duit Rp.10000 maring bapake sing duwe warung.

Suwe deenteni, bapake ora ngenei jujulan, si bocah kuwe njur takon.

C: “Pak, jujule Pak?”

A: “Oh iya! Duite koweRp.10000, regane Rp.8000. dadi jujule pira ndul?” (cengar-cengir karo ngledek)

Si bocah bingung, ndregdeg… arep njawab apa yah… LONG EWU? duh durung latihan!

Karo madan grobyos akhire bocah sing ora nduwe sifat putus asa kiye njawab:

“NOJENG Pak… “.

(Hayooo bapake arep ngomong apa maning! he3).

Bar nampa duit Rp 2000 (RONG EWU), si bocah balik kanan kambi mesem tanda MENANG… “YESSS”.

Molal of the stoly:

“ Hidup adalah peljuangan, beljuanglahlah telus dan jangan mudah  ‘menyelah’! Sebab, selalu ada cala kalau diilingi dg doa dan usaha…” :)

Tentang Penulis

Leave A Response