Grabagan Guritan Banyumasan (Inyong Sapa Rika Sapa)

Ditulis 22 Apr 2016 - 05:56 oleh Banyumas1

buku guritan banyumasanSedurungé ana listrik mlebu ndesa, masjid uga tajug depadhangi nganggo petromak utawané lampu gembréng sing deiseni lenga latung. Saben pirang dina sepisan bocah-bocah sing pada ngaji turutan (juz ‘amma) deprentah dening guru ngajiné dekon pada grabagan. Yakuwé urunan awéh duwit sing jumlahé wis detemtokna. Sewisé kumpul, duwité nggo tuku lenga latung.

Neng pogé taun 2015, Presiden Geguritan Banyumas, Wanto Tirta ngoprak-oprak maring kanca bathir sing pada teyeng nulis dekon pada grabagan. Sing degrabag dudu duwit nggo tuku lenga latung kaya bocah jaman ganu, ningén grabagan guritan Banyumasan. Mbareng kiriman guritan sekang penggurit wis kumpul, depilah-pilih (sunting) banjur degawé buku cétak.

Buku kuwé sekiyé wis terbit, judulé ‘Inyong Sapa Rika Sapa Antologi Geguritan Banyumasan’. Duwit sing nggo wragad nyétak buku uga nganggo cara grabagan. Sapa sing képengin duwé bukuné ya kadu urunan.

Neng buku grabagan kiyé ana 96 guritan sing detulis dening 36 penggurit. Wigatiné nyétak buku kiyé miturut tukang suntingé, Wanto Tirta, jérémongé nggo ngipuk-ipuk basa Penginyongan. “Inyong nulis gurit basa Banyumasan, ya muga-muga baé bisa nggo nguri-uri basa Banyumasan,” ngomongé Wanto.

Ngiras-ngirus buku kiyé uga nggo nyumbang (kado) Mahargya Ambal Taun kaping 445 Kabupaten Banyumas, 22 Pebruari sing wis kepungkur. Kejaba kuwé, buku sing deterbitna dening Penerbit Aksara Indonesia, Yogyakarta (2016) kiyé, mituruté Ketua Serulingmas Yogyakarta, Hj. Yani Saptohoedoyo, anané buku kiyé kanggo ngelingna wong Banyumas neng ngendi baé.

“Saora-orané njutan kemutan inyong kiyé sapa – rika sapa, dadi ora kelalén maring jati diri uga basané dhéwék’, ngendikane Hj Yani.

Bupati nerima Buku 'Inyong Sapa Rika Sapa'

Bupati nerima Buku ‘Inyong Sapa Rika Sapa’

Geguritan Banyumasan sing degrabag dening 36 penggurit kiyé uga kanggo nepungna penggurit neng tlatah Banyumas karo kasil karyané dhéwéké. “Dadi kumpulan kiyé dadi srana srawung wetara penggurit, pegiyat sastra Banyumasan karo masrakaté dhéwék,” kuwé jeremongé pegiyat sastra Banyumasan, Jefrianto.

Kejaba urunan guritan, dhéwéké uga gawé tulisan pungkasan (epilog), ‘Ndaru Neng Langit Banyumas’ neng lembar-lembar akhir buku kiyé. Nyatané penggurit sing padha grabagan asalé sekang pirang-pirang kalangan. Ana mahasiswa, pelajar SMU (peserta gladen geguritan), guru, kepala sekolah, pengawas, wartawan, seniman music, aktor teater, penulis novel, ingsinyur, uga lurah.

Angger getén maca guritan sing ana ning buku kiyé, pancen bener omongé Pemerhati dan Penulis Budaya Banyumasan, Drs. H. Budiono Herusatoto, “Buku kiyé kena nggo pengéling-éling maring wong Banyumas neng endi baé karo kena nggo ginau basa daerahé dhéwék.”

Jajal decipi cuilan guritané Saeran Samsidi sing judulé ‘Balia Maning’:

Éling-éling njur padha mendem/

tembang banyumasan ricik-ricik/

budaya Banyumas mayuh dhemen/

derumat sing nganti becik/

Lewih teges maning guritané Rindra Rahmatulloh sing judulé ‘Basa Penginyongan’:

Mula, mayuh kakang mbekayu!/

Sing bagus-bagus, sing ayu-ayu/

Inyong rika padha sing miwiti/

Banyumasan kiyé deuri-uri/

Mayuh….sedulur, sing padha kepéngin duwé buku kiyé, padha grabagan duwit, jalaran nyétaké gumantung karo pesenan. (Hamidin Krazan)

 

Tentang Penulis

Leave A Response