Mendoan tambah kondang, kesuwun Pak Fudji Wong

Ditulis 07 Nov 2015 - 09:37 oleh Banyumas1

FB_IMG_1446650061294Mendoan. Panganan asli Banyumas sing saiki lagi tambah kondang sejagat gumirat. Lagi dadi polemik basa kerene. Ya, polemik mendoan lagi rame merga panganan sing digawe nganggo bahan dasar tempe tipis, dikemuli glepung atawa tepung sing wis dibumboni, terus digoreng setengah mateng, sing wis dadi panganan sedina-dina wong Banyumas lan sekitare diaku-aku dadi merk dagang atawane didaftarna patene dening salah sijineng pengusaha, yaiku Fudji Wong.

Wong Banyumas ora pada trima, lha enggane panganan sing wis dadi ‘bagian kehidupan sehari-hari masyarakat banyak’, khususe wong Banyumas koh diaku dadi merk eksklusif deweke.

Pancen Fudji Wong nganti seprene ora nuntut karo bakul- bakul gorengan mendoan sing dodolan mendoan ning warung-warung, bakul gorengan kaki lima, lan warung oleh-oleh mendoan kaya sing akeh ana ning Sawangan, Purwokerto.

Mung tetep bae pada watir, angger sing arane merk wis dipatena, bisa bae ngemben dimasalahna ding pengusaha sing duwe merk MENDOAN mau. ‘Pati-pati ngusulna hak merk maring pemrentah mestina ya ana maksude, mbok perlu nggo duit ngusulna merk kuwe’, jare bakul gorengan sing mangkal saben sore ning jalan Sudirman wetan.

Gara-gara merk MENDOAN dipatena, mendoan nganti mlebu tivi. Pak Achmad Husein tampil ning tivi. Koran-koran lan media online, uga media sosial ngabarna soal mendoan. Ana gerakan #saveMendoan mbarang.

Tokoh budayawan ya melu cawe-cawe, kaya budayawan Banyumas Ahmad Tohari. Intine ora setuju merk MENDOAN dadi hak khusus perorangan.

Gara-gara Fudji Wong mendoan tambah kondang, wis dadi isu nasional. Kayane angger masalah marakna dadi tambah moncer malah kudu nyampekna trima kasih karo Fudji Wong yah…

Mung bae carane gawe nambah kondange mendoan ora pas. Ndean tah angger cara promosi mendoan nganggo acara ‘Festival Mendoan’ lewih apik atawa ‘elegan’. Ora tambah kondang merga ana isu. Kaya artis bae sing tambah kondang dibritakna ning tivi merga kasus. O… mendoan…

Muga-muga bae masalah kiye cepet rampung ya sedulur. Pemrentah bisa cepet nei solusi sing adil kanggo sakabehane, mendoan bisa tetep dadi duweke wong Banyumas lan sekitare.

Mendoan oh mendoan … eh, dadi kepengin mangan mendoan anget.

 

Tentang Penulis

1 Komentar so far. Feel free to join this conversation.

  1. putri 22/11/2016 pukul 08:48 -

    baca ini jadi kangen kampung dan mendoan anget.. 🙂

Leave A Response